Sparnaður sem veldur raunaukningu kostnaðar!

Ja hérna, er svo sem ekkert hissa! En sjá þau ekki að þessi sparnaður vegna leiguíbúða mun reynast dýrkeyptur. Fleiri nauðungarsölur, meira af flutningum, uppboðskostnaði og félagslega aðstoð verður að auka.  Þessi sparnaður er enn ein árásin á það litla sem eftir stendur af raunverulegri aðstoð vegna húsnæðisskjóls!!

Hægt er að kaupa auðar íbúðir eða íbúðir á nauðungarsölu og breyta í leigu- eða hlutareignaríbúðir!

Fallið frá fjölgun leiguíbúða

Mannréttindi brotin með vísitöluna að vopni!

Enn einu sinni er verið að benda okkur á að óbeisluð eignarstefna með markaðshyggjustjórnleysi er brot á grunnrétti hvers manns.  Grunnrétti til öruggs húsnæðis fyrir sig og sína!

Markaðurinn sveiflast upp og niður og skapar óörygggi hvað þá í verðbólgu með verðtryggð lán eigandans á móti óháðu lögmáli markaðarins. Það hefur alltaf legið fyrir að lán gæti farið yfir söluverð! Og sett svokallaðan eiganda í skuldafangelsi!  Því miður hefur aldrei félagslega hugsun norðurlandana náð hingað til lands. "Stattu þig" ekkert væl er frekar okkar leið! Að búa í öruggu húsnæði sem er óháð sveiflum markaðar og vísitölu er ekki á stefnuskrá ríkisstjórnarinnar. 

Nú er sagt að það sé eðlilegt að verðtryggð lán hækki helmingi meir en nýjar tekjur ríkissjóðs af áfengi og bensíni.  Það er líka sagt að ekkert sé hægt að gera þetta sé lögmál vísitölunnar.  Bull, auðvitað á að skoða samsetningi vísitölunnar, og taka út ákveðna þætti sem koma húsnæðismálum ekkert við.  Þannig mundi verðtryggð húsnæðislán hækka mun minna! Auk þess á að breyta leigu- og vaxtabætur í húsnæðisbætur sem miðast við að 25% af launum að hámarki fari í íbúð. Íbúð af eðlilegri stærð miðað við tekjur og fjölskyldu.  En svo má auðvitað byggja sjálfur það er val hvers og eins.

En engin alvöru húsnæðismarkaður er til á Íslandi! Engin sveitarfélög, félög eða samtök sem eiga og reka íbúðir til leigu eða hlutareignarkaupa.  Algjört rugl er á þessum markaði og við sjálf fórnarlömb getuleysis ráðamanna.  Engin stendur upp og þorir að breyta þessu frá grunni! Skoða allann húsnæðismarkaðinn og stjórna betur kostnaðinn við að búa í öruggu húsnæði.  Þetta verður ódýrara þegar upp er staðið.  Minna um óþarfa flutning, allskonar millikostnað og opinber lántökugjöld.  Og betra viðhald húsnæðis fylgir þessu, og ætti að vera ódýrara en í dag.

En hér þarf að skoða t.d. sænska búsetumarkaðinn og taka það besta þaðan og byggja upp öruggt skjól fyrir íslendinga. Fækkum nauðungarsölum og læknaheimsóknum íbúðarnotenda í nauðum!

25 til 30% lækkun þarf á fasteignamarkaði

Áfellisdómur!

Enn og aftur sannast lærð siðblinda ráðamanna.  Þetta hefur viðgengist frá stofnun lýðveldisins að siðferðisleg ábyrgð fylgdi ekki embættum.

Hér sannast aftur þessi blinda hegðun.  Að segja þetta er alþjóðlega virt stofnun sem skýringu á vali endurskoðanda,  sannar þetta.  Að afgreiða fjöldkyldutengsl með að ekki er talin ástæða til að efast um hæfni eða óhæfni endurskoðanda,  sannar þetta. 

Ég er ekki að tala um þessa hluti! Ég er að tala um traust sem byggir á að breytt sé um aðferðir við þessa vinnu. Að ég geti trúað þvi að siðferðisleg ábyrgð sé í heiðri höfð.  Ég er að tala um að ekki sé valið innan hópsins til að "endur"skoða hópinn.

Farið yfir störf KPMG fyrir skilanefnd Glitnis

Sjálfhverfing ó sjálfhverfing! Nóg er komið!

Fengum bakslag og þurfum að taka til heima hjá okkur.  Líta í eigin barm vera heiðarleg í sjálfskoðuninni. 

Slíkt vantraust á stjórnendur landsins er komið upp að erfitt verður að laga.  Stöður þeirra eru tákn um ábyrgð um traust það sem við sýndum þeim!  Smátt og smátt er að koma í ljós að gömlu leiðirnar eru enn farnar í blindni.  Fjármál landsins skulu vera innanbúðarmál og okkar fólk gera úttektirnar.   Þetta á ekki að geta komið fyrir en kemur fyrir.  Ofurlaun framkvæmdastjóra lífeyrissjóða landsins er sér mál og furðumál!  Hvaða stjórnir réðu þessa menn á þessu kaupi? Kaup sem er í engu samræmi við kjör sjóðsfélaga og eigendur sjóðanna. Segjum þeim upp og ráðum á vitlegum launum stjórnendur okkar.  Þetta gildir líka um forstjóra ríkisstofnana!

Annað er í raun verra.  Við verðum að spara.  Og hvar er sparað?  Jú, framlag til alþjóðahjálpar fátæku fólki er lækkað.  Erum hálfdrættingar á við aðrar norrænar þjóðir! Við lækkun framlög vegna forvarnarvinnu og meðferðaraðstoðar! Þessar aðgerðir eru svimandi ótrúlegar! Á  mörgum stöðum liggur peningur í ríkiskassanum sem færa má til og nota til hjálpar fólki í neyð.  Ég krefst þessa!  Bara laun ofangreindra stjórnenda mundu duga langt!

Ég held að íslendingar séu sjálfhverfasta þjóð sem til er.  Efrimörk okkar vegna neysluþarfa eru ótrúlega há og neðri mörk til aðstoðar ótrúlega lág.

Auðvitað sjáum við um okkar fólk! En einhver takmörk feru fyrir þessa tilbúnu þörf ríkisjóðs út um allar trissur gengur ekki lengur.  Er skrítið að eftir situr ráðafólk rúið trausti? Er krafan um nýtt fólk óréttlát og persónuleg?  Nei traustið er farið og þetta snýst um ábyrgð embætta ekki persóna. Og þetta snýst um hugsjónir, um mannkærleika,  um réttláta skiptingu sameiginlegra fjármuna.

Ég er alveg komin með allt upp í kok - þoli illa meiri fréttaflutning ef engin breyting verður á málunum.  Gott fólk kyngjum ekki ástandið vegna biðlundarþolinmæðis ráðamanna eftir því! Bið þeirra eftir gleymsku okkar.

Útgjöld heimila hækkuðu um 11%

Lausarmiðuð samvinna?

Satt er það,  fjarlægðin gerir fjöllin blá og mennina mikla.   Neikvæð umræða, neikvæður tónn þúngbúin andlit allt gerir þetta lífið erfiðara.  Minnir á glæsiráðamannaröðina í Moskvu á tyllidögum. En svo er á bakvið verið að brölta, gera hlutina.  Þetta fréttist svo í sér útbúnum fréttamannfundarskömtum í magni og athæfi sem gerir fjarlægðina við okkar borgarana sýnilega öllum.   Og allt í fyrirfram snilldarlega ákveðnum upplýsingaskömtum sem kosnir fulltrúar okkar vilja meina að við sem íslendingar þolum.

Það er 1. des. og ætti að vera mikill hátíðadagur en verðgildi hans hríðfellur eins og krónan! Sjálfstæði okkar varð til á þessum degi 1.des. 1918.  Þá tókum við ábyrgð á landi og þjóð.  Nú segjast ráðamenn ekki bera persónulega ábyrgð á þessu hruni!  En hver er að segja það?

Embættin, stöðurnar sem þið hafið er tákn ábyrgðar ykkar.  Sýnileiki þess að þið hafið viljað, sóst eftir þessum stöðum og í þessu felst ábyrgð ykkar.  Persónuleg eða ekki breytir engu,  staðan krefst þess að ábyrgð sé tekin.  

Eftirfarandi máltæki segir mikið fyrir mig  "Í dag ætla ég að reyna að temja mér auðmýkt hjartans og vera ekki hrædd(ur) við að viðkenna breyskleika minn." 

Claus Möller segir að við þurfum sterkan leiðtoga sem við treystum. Hvar er hann í sjónmáli? Og hver er í raun óvinurinn?  Ekki veit ég en held ekki að hann sé slagurinn milli stjórnar og stjórnarandstöðu.  Frekar er óvinurinn, óvissan, skortur á trausti, skortur á leiðtoga, skortur á markvissri fréttamennsku einhver óskiljanlegur skortur - eins og vítamínskortur að haustlagi.

Þetta óöryggi eyðileggur alla getu til að vera af alhug í lausnarmiðaða vinnu. Það þarf kjark og auðmýkt að byrja á ný með nýja hugsjón að leiðarljósi.  Hver getur leitt þessa vinnu?

Íslendingar einblína á vandann

Gott, en því miður bara plástur á eftirlaunasárið! Skoðun betur annan raunveruleika!

Ágætis framtak en of skammt farið og alltaf kemur þetta í seinna fallinu.  Fólk orðið pirrað og þreytt á meðan stjórnarfólk er að hugleiða sjálfsagða hluti.  Ráðherrar eru of lengi að hugleiða í stað þess að framkvæma og vera með gott upplýsingalón með flæðandi miðlun fyrir almenning og fjölmiðlafólk.

Erfitt verður að vinna traust þjóðarinnar eftir skamm- og langtíma aðgerðarleysi. Held að það sé vonlaust því miður og boða verður til kosninga vorið 2009.  En fyrst þarf að leysa ákveðin mál.

En mín upplifun er að traust á núverandi stjórnendur sé endanlega farið og gera verði stórar breytingar hjá okkur.  

Húsnæðisvandinn er gífurlegur hjá leigjendum og eigendum íbúða.  Athyglisverðar eru hugmyndir Gunnars Tómassonar hagfræðings um að ríkið komi inn í 200. milljarða vísitöluhækkun komandi árs með sér aðgerðum í samvinnu við lánastofnanir..  Hún leggist sem sagt ekki á lántakanda á meðan aðalkúfurinn er að fara yfir okkur. 

En um leið verður að endurskoða uppbyggingu vaxta- og húsaleigubótakerfisins með hámarks búsetukostnaðar hvers og eins í huga miðað við fjölskyldustærð og tekjur.  Einnig verður að endurskoða aðrar bótaleiðir.  Og einnnig allar óendanlegu greiðslulækkandi tekjutengingar okkar við allt og alla.

Eignastefna í húsnæðismálum hefur ekki skapað það öryggi sem látið er af heldur sífelldar reddingar og spennu hjá eigendum. Og nú er hún endanlega liðin undir lok.  Nýjar leiðir verða að fá að blómstra og tryggja húsnæðisöryggi okkar. Viðhöldum ekki vitleysuna.  Fórnarkostnaðurinn hefur verið of mikill.  

Of mikið er af skammtíma reddingum! Of mikið af plástrum á sár án þess að þau fái tækifæri til að gróa. Við hugsum og vinnum of mikið en framkvæmum um leið of lítið. Tökum því rólega og sköpum stöðugt umhverfi fyrir fólk.   

Hættum að plástra og gerum alvöru breytingar á trygginga- og bótakerfum okkar.  Komum á alvöru grunnöryggi í húsnæðis- og lágmarksafkomumálum okkar.

Ég mótmæli skorti á þolinmæði núverandi og síðustu ríkisstjórna til að koma á raunverulegu grunn öryggi fyrir búsetu á Íslandi.

Óska eftir launalækkun

Auðvitað verða kosningar vorið 2009!

Auðvitað verður að kjósa næsta vor! Hvað er að fólki?  Hvernig hvarflar það að núverandi ráðafólki á þingi, ríkisstjórn, seðlabanka eða embættismanna að þau geti annast uppbygginguna eftir að hafa gjörsamlega sofið á verðinum til margra ára?

Auðvitað viljum við kjósendur segja okkar skoðun! Auðvitað viljum við sem borgun herlegheitin ráða því hverjir haldi um endurreisn íslenskt samfélags.

Auðvitað vill ekki núverandi ráðaklíka sleppa valdinu. Hvað gæti komið í ljós við það? Valdafíkn, vináttuvæðing,  fjölskyldutengsl og skortur á nýjum hugmyndum á nýjum leiðum er að eyðileggja þjóð okkar.

Auðvitað verður ný stefna og nýjar hugmyndir að komast að núna. En það gerist ekki með verndara kerfisins í fararbroddi.  Ótrúlegt umburðarlyndi okkar kjósenda er að fara með okkur til fjandans gott fólk. 

Auðvitað hefur (þröngsýni) skortur á fjölbreytni og stuðningur við nýjar leiðir í framleiðni gert okkur lífið erfiðara til framtíðar.

Auðvitað er algjör upplýsingaskortur til hins almenna borgara.  Upplýsingar settar fram skiljanlega varðandi afkomu okkar.  Hvernig á nákvæmlega að bregðast við húsnæðisvandunum í dag og til framtíðar.  Hvernig á að breyta tryggingakerfinu til þess að allir finni öryggi hvar sem þeir eru staddir í dag. Töflur og skýringar, upplýsingar í fjölmiðlum og hjá viðkomandi stofnum.  Eitthvað smá skiljanlegt með dæmum. Takk! Þessi óþægilega tilfinning að engin sé við stjórn verður að hverfa eða minnka fljótt.

Auðvitað hvílir enn mikill doði og vantrú á að þetta sé raunveruleiki yfir okkur. Þessvegna verða allar upplýsingar að koma fram núna og ekki í gær!

Þegar við vöknum upp við harðann raunveruleikann verður þetta öryggi að vera til.

Og svo kjósum við nk. vor en áður skiptum við um þá embættismenn og ráðherra sem þurfa þykir.

Gangi okkur vel.

Lífið er einfalt!

Nokkur orð til afréttingar inn í daginn.  

Lífið er einfalt! Hversvegna flækja það fyrir þér? Hvers vegna velja hlykkjóttu leiðina þegar beina brautin liggur fyrir framan þig? Fylgdu réttri framþróun í lífinu og reyndu ekki að þvinga neitt fram. Þú getur ekki þvingað blóm að opnast! Ef þú reynir það, eyðileggur þú fegurðina og fullkomnunina í blóminu með óþolinmæði þinni. 

Það er réttur tími fyrir allt.   Því ekki að vera í takti við lífið, fylgja því og sjá undur Mín og dýrð birtast í sannri fullkomnun?  Þegar eitthvað er gert á röngum tíma, tefur það í stað þess að flýta fyrir eins og ætlunin var.  Bíddu þess vegna eftir Mér í kyrrð og trausti. Reyndu aldrei að æða áfram og framkvæma á röngum tíma. 

Hins vegar skaltu aldrei silast og eyða þannig dýrmætum tíma.  Gerðu þér grein fyrir að dýrðlegt munstur og áætlun er í öllu sem þú gerir og þakkuðu eilíflega fyrir.

Eileen Caddy

Lánsumsókn Íslands hjá IMF afgreidd á miðvikudag

Afhverju ekki skoðun?

Afhverju má ekki ASÍ hafa skoðun sem hreyfing.  ASÍ er allt annað en ríkisstjórnin! Auðvitað á ASÍ að hafa skoðun og segja frá því ef þeim sýnist að ráðherrar eigi að víkja.  Auk þess er hér verið að tala um siðferðislega ábyrgð embættis ráðherra ekki persónulega. Sem svo auðvitað endar í ákveðinni persónu sem hefur tekið ábyrgðina að sér en ekki staðið sig að mati einhvers.  Þetta þarf ekki að rökstyðja umfram það sem margoft hefur komið fram í fjölmiðlum.

Komin er tími til að kosnir fulltrúar hagi sér í samræmi við að vera kosnir fulltrúar þjóðarinnar en ekki til persónulegrar valda.!!!

Ráðherrar hljóta að bera ábyrgð á málaflokkum sínum.  Hér er ekki verið aðeins að tala um "Ice-Save".  Heldur allann pakkann lög, reglugerðir og eftirlit. Og koma upplýsingum svo frá sér.

Vegið ómaklega að ráðherrum

Skoði hver eigið siðferði, sjálfan sig og gjörðir.

Óvart fór orðsendingin "ranga" leið. Ekkert fer ranga leið heldur eins og það á að fara! Þessi orðsending fór rétta leið og opnaði á óæskileg vinnubrögð.  Afhjúpaði vinnubrögð, baktjaldamakk sem ég held viðgangist víða í samfélaginu. Hvað þá nú um stundir. 

Bjarni flott hjá þér!! megi aðrir taka þig sem fyrirmynd í sinni endurskoðun.

Siðferðiskennd og heiðarleiki hvers og eins á að ráða för en óheiðarleiki og sjálfmiðuð sýn á veruleikann ásamt valdafíkn er of oft aflið sem stýrir gjörðum.   Þetta veldur trúnaðbrest milli manna og  ætti oftast að vera nægjanlegt fyrir afsögn.

Formaður V.R. er í erfiðu máli. Satt fundi þar sem stór afsláttur var gefinn á skuldum. ! Kanski jákvæð mismunun þegar hugsað er til annarra skuldara í landinu?  Formaðurinn getur útskýrt allt, líka launamálin og er það gott.  En eftir situr vantrú vegna siðferðisbrestar sem veldur reiði og  trúnaðarbrest sem situr eftir alveg óafgreiddur.  Og héðan er aðeins ein leið,  að segja af sér vegna þess að trúnaðurinn og traustið er horfið.    

Það er endalaust hægt að ræða þetta með siðferðið  Þegar skortur er á siðferðiskenndinni verður óheiðarleiki og eigingirni ráðandi afl. Óttinn við að afhjúpast sem mannlegur með td. bresti stjórnar för. Lygin, eða að segja ekki alveg satt eða alveg allt, er eina aðferðin sem menn virðast hafa til að viðhalda óbreyttu ástandi.  Til að halda í völdin sem sjálfsvirðing of margra ráðamanna virðist byggð á.  Vilja leiðrétta sjálfur það sem fór úrskeiðis þrátt fyrir áður auðsýnt getuleysi og augljósa ábyrgð á ástandinu.  Þrátt fyrir að ekki hafa staðið vaktina og enn ekki kunna að tala skýrt við okkur hina íslendingana.

Sjálfstæðisflokkur og Samfylkingin eru saman í ábyrgðinni.  En auðvitað hefur annar setið við völd í 17 ár en hinn í rúmt ár. 

En of lítið heyrist í ábyrgð Samfylkingarinnar.  Rödd ábyrgðar talar ekki nægjanlega skýrt þar en trúnaðbrestur hefur einnig orðið við hann vegna ástandsins á Íslandi.

Er trúnaðarbrestur, augljós skert siðferðiskennd, algjör blindni af stjörnubirtunni frá útrásarvíkingunum og augljós eigingirni í vinnubrögðum er nægjanleg ástæða fyrir að segja af sér.

Og leyfa kosningar og öðrum að taka við og byrja upp á nýtt.  Því þetta erfiða ástand er um leið stökkpallur okkar inn í nýjan veruleika á Íslandi.  

 

Bjarni íhugi stöðu sína